ਅਸ਼ੋਕ ਵਰਮਾ , ਮਮਦੋਟ 28 ਜੂਨ 2023
ਫਿਰੋਜ਼ਪੁਰ ਜ਼ਿਲ੍ਹੇ ਦੇ ਬਲਾਕ ਮਮਦੋਟ ਤੇ ਵਿਧਾਨ ਸਭਾ ਹਲਕਾ ਗੁਰੂਹਰਸਹਾਏ ਅਧੀਨ ਪੈਂਦੇ ਪਿੰਡ ਨਵਾਂ ਕਿਲਾ ਵਿਖੇ ਆਪਣੇ ਪਰਿਵਾਰ ਨਾਲ ਖੇਤਾਂ ਵਿੱਚ ਝੌਨਾ ਲਾਊਣ ਗਈ 11 ਕਲਾਸ ਦੀ ਵਿਦਿਆਰਥਣ ਦੀ ਟਿਊਬਵੈੱਲ ਤੇ ਪਾਣੀ ਪੀਣ ਸਮੇਂ ਕਰੰਟ ਲੱਗਣ ਕਾਰਨ ਮੌਤ ਹੋ ਜਾਣ ਦਾ ਮਾਮਲਾ ਸਾਹਮਣੇ ਆਇਆ ਹੈ। ਮਿ੍ਤਕ ਲੜਕੀ ਦੀ ਪਛਾਣ ਪਰਵੀਨ ਕੌਰ ਪੁੱਤਰੀ ਉੱਤਮ ਦੇ ਤੌਰ ਤੇ ਕੀਤੀ ਗਈ ਹੈ। ਲੜਕੀ ਦੇ ਪਿਤਾ ਉਤਮ ਨੇ ਦੱਸਿਆ ਉਹ ਮਿਹਨਤ ਮਜਦੂਰੀ ਕਰਕੇ ਗੁਜ਼ਾਰਾ ਕਰਦੇ ਹਨ ਅਤੇ ਇਨ੍ਹਾਂ ਦਿਨਾਂ ਦੌਰਾਨ ਆਪਣੇ ਪਰਿਵਾਰ ਸਮੇਤ ਖੇਤਾ ਵਿੱਚ ਝੋਨਾ ਲਗਾ ਰਹੇ ਸਨ ।
ਉਨ੍ਹਾਂ ਦੱਸਿਆ ਕਿ ਇਸ ਦੌਰਾਨ ਉਸ ਦੀ ਲੜਕੀ ਪ੍ਰਵੀਨ ਕੌਰ ( 14) ਜੋ ਪਿੰਡ ਕੜਮਾ ਵਿਖੇ 11 ਵੀਂ ਕਲਾਸ ਦੀ ਵਿਦਿਆਰਥਣ ਹੈ ਗਰਮੀ ਕਾਰਨ ਆਪਣੀ ਪਿਆਸ ਬੁਝਾਉਣ ਲਈ ਟਿਊਬਵੈੱਲ ਤੇ ਪਾਣੀ ਪੀਣ ਗਈ ਸੀ । ਇਸ ਮੌਕੇ ਡਾ ਬਿਜਲੀ ਦੇ ਕਰੰਟ ਨੇ ਉਸ ਨੂੰ ਆਪਣੀ ਲਪੇਟ ਵਿੱਚ ਲੈ ਲਿਆ ਜਿਸ ਕਰਕੇ ਉਸ ਦੀ ਮੌਕੇ ਤੇ ਹੀ ਮੌਤ ਹੋ ਗਈ।
ਪਿੰਡ ਦੇ ਸਰਪੰਚ ਰਣਧੀਰ ਸਿੰਘ ਨੇ ਦੱਸਿਆ ਇਹ ਪਰਿਵਾਰ ਬਹੁਤ ਹੀ ਅੱਤ ਦੀ ਗਰੀਬੀ ਵਿੱਚ ਗੁਜਾਰਾ ਕਰ ਰਿਹਾ ਹੈ ਅਤੇ ਇਸ ਮੁਟਿਆਰ ਧੀ ਦੀ ਮੌਤ ਕਾਰਨ ਪਰਿਵਾਰ ਬਹੁਤ ਹੀ ਡੂੰਘੇ ਸਦਮੇ ਵਿੱਚ ਹੈ। ਉ ਪੰਜਾਬ ਸਰਕਾਰ, ਜ਼ਿਲ੍ਹਾ ਪ੍ਰਸ਼ਾਸਨ ਤੇ ਹਲਕਾ ਵਿਧਾਇਕ ਫੌਜਾ ਸਿੰਘ ਸਰਾਰੀ ਨੂੰ ਇਸ ਗਰੀਬ ਪਰਿਵਾਰ ਦੀ ਆਰਥਿਕ ਸਹਾਇਤਾ ਕਰਨ ਦੀ ਅਪੀਲ ਕੀਤੀ ਹੈ ।